Gipatuman na sa probinsyal nga panggamhanan sa Davao del Norte og Compressed Work Week Scheme nga gisugdan niadtong adlaw nga lunes hangtod karong adlaw nga Huwebes ang onsite work sa mga opisina sa probinsya.
Sumala sa advisory sa Provincial Government of Davao del Norte, magsugod ang oras sa trabaho alas 7:00 sa buntag hangtod alas 6:00 sa gabii, diin 10 ka oras matag adlaw, nga may 40 ka oras matag semana, subay sa giya sa Civil Service Commission pinaagi sa Memorandum Circular #14 nga gipaguwa.
Tumong sa maong lakang ang pagtipid sa enerhiya ug pagminus sa gastos sa operasyon, ilabi na sa nagkataas nga presyo sa gasolina, kuryente, ug uban pang galastusan sa gobyerno.
Bisan pa niini, giklaro nga magpadayon gihapon ang Lunes hangtod Biyernes nga operasyon sa mga opisina nga may kalabutan sa disaster ug emergency response, lakip na ang Provincial Disaster Risk Reduction Management Office kon PDRRMO, mga health services sama sa Health Infirmary para sa OPD ug paanakan, motorpool operations, ug LEEDMO alang sa collections.
Kahinumduman, nga nagmando si Pangulong Ferdinand Marcos Jr, nga ipatuman ang maong working scheme gumikan sa nagpadayong tensyon sa Middle East.
Photo Courtesy:davaodelnorte.gov.ph
