Nakab-ot sa Filipino Olympian ug pole vaulter nga si EJ Obiena ang season-best clearance nga 5.78 metros aron makadaog og bulawan sa ISTAF Indoor nga gipahigayon sa Berlin, Germany.
Usa lamang ka attempt ang gikinahanglan ni Obiena aron malabwan ang 5.78 metros ug makuha ang top spot sa kompetisyon. Sa sayo nga bahin sa event, duha ka attempts ang iyang gihimo aron malabyan ang 5.60 metros.
Ang atleta gikan sa Norway nga si Simen Guttormsen nakalampus usab sa 5.78 metros apan nakasakmi lamang kini og silver medal tungod mas daghan siya og attempts sa mga nag-unang height.
Gisulayan usab ni Obiena ug Guttormsen ang 5.83 metros, apan wala nila kini makuha. Samtang, nagtabla sa ikatulong puwesto sila Menno Vloon sa Netherlands ug Bo Kanda Lita Baehre sa Germany human malampasan ang 5.70 metros nga taas.
Photo Courtesy: Philippine News Agency
