Hugtanong gilimod ni Sandara Park ang mga pasangil ni Park Bom nga siya migamit og ilegal nga droga, ug giingong walay kamatuoran ang maong alegasyon nga naglambigit sa iyang ngalan.
Sa usa ka mubo nga pahayag nga iyang gipagawas sa Instagram, klarong gipahayag ni Sandara nga wala siya nigamit og bisan unsang ilegal nga substansiya.
Bisan pa sa kontrobersiya, nanghinaot siya nga anaa sa maayong kahimtang si Bom ug malikayan ang dugang pang kasamok.
Sumala sa report sa The Korea Herald, giingon ni Bom nga gigamit siya aron tabonan ang usa ka isyu sa droga nga giingong naglambigit kang Sandara.
Subay sa iyang gi-post sa social media, miingon si Bom nga gitawag siyang “drug addict” aron ibalhin ang atensyon sa publiko gikan sa iyang kauban sa 2NE1.
Ang maong isyu dali nga mikaylap sa social media ug nakapukaw og reaksyon gikan sa mga fans sa K-pop. Sa pagkakaron, wala pa’y dugang nga opisyal nga pahayag gikan sa ubang kampo kabahin sa kontrobersiya.
