Gilamoy sa kalayo ang dili moubos sa napulo ka mga panimalay sa Purok Tonggo, Brgy. Minaog Dipolog City niadtong, Marso 5, 2026. Nagsugod ang sunog kapin kon kulang alas 4 sa hapon diin matod pa nakadawat ug tawag ang BFP Dipolog sa may alas 4:15 sa hapon.
Base sa usa sa mga residente nga lakip sa nasunugan ug panimalay, adunay nibuto gikan sa silingan nila nga balay ug didto na miulbo ang kalayo.
Dali nga mikatap ang kalayo tungod ginama sa light materials ang mga panimalay ug kusog usab ang hangin diin miabot sa 3rd alarm ang maong sunog. Atol sa pakigsusi sa mga personahe sa BFP nga niresponde sa sunog, nagfire under control kapin kon kulang alas 5:03 sa hapon.
Saysay pa ni Norasia Esmael Solaiman, usa sa mga nasunugan nga wala siya’y nasalbar bisan usa sa iyang mga gamit diin hurot nga gilamoy sa kalayo ang ilang panimalay lakip ang iyang tindahan.
Wala usay gikataho nga nasamdan o casualty sa nahitabong sunog. Wala pa usab nihatag ug detalye kalabot sa hinungdan sa maong sunog ang habig sa BFP ug padayon pa ang ilang gihimong imbestigasyon.
