Target karon sa Philippine Coconut Authority (PCA) Region 9 nga makatanom ug dul-an 800K ka mga Coconut seedlings sa tuig 2026 isip kabahin sa pagpalig-on sa industriya sa lubi sa rehiyon.
Matod ni Monico F. Adaza Jr, Provincial Development Office III sa PCA Region 9 ang maong ihap nga tinguha nilang matanom gikan na sa tulo ka mga component kabahin sa Massive Coconut Planting.
Dugang pa niini, ang massive coconut planting sa gobyerno nagtumong sa pagpadaghan sa mga punuan sa lubi nga matanom sa mga mag-uuma sa kinatibuk-ang rehiyon sa Zamboanga Peninsula.
Tumong sa programa nga mapalambo ang panginabuhi sa mga magniniyog og masiguro ang padayon nga suplay sa lubi ug mga produkto niini sa merkado.
Kabahin usab kini sa mas dako nga plano sa gobyerno nga makatanom og minilyong punoan sa lubi sa tibuok nasud, aron mapalig-on ang produksyon sa lubi sa mga Coconut farmers.
