Nanumpa ang liboan ka mga magtutudlo nga bag-ong napromote sa Department of Education (DepEd) Davao Region ubos sa Expanded Career Progression (ECP) program sa usa ka seremonyang gipahigayon sa gymnasium sa Nabunturan National Comprehensive High School gahapong adlawa Marso 5, 2026.
Ang maong panumpa ang paghatag og mas taas nga ranggo ug dugang nga benepisyo sa mga magtutudlo, lakip na ang pagtaas sa ilang suweldo ug pagpalambo sa ilang papel sa pagserbisyo sa sektor sa edukasyon.
Sa pakighinabi sa Juander Radyo Nabunturan News Team ni Congressman Jhong Ceniza, iyang gipahayag nga ang maong promosyon resulta sa bag-ong polisiya nga gipasiugdahan sa DepEd aron hatagan og mas daghang oportunidad ang mga magtutudlo nga dugay nang nagserbisyo apan wala pa mahatagi og promosyon.
Samtang, mitambong usab sa kalihukan ang Mayor sa syudad sa Tagum nga si Rey T. Uy, kinsa nagpasiugda sa kahinungdanon sa kalidad nga edukasyon alang sa kabataan. Matud pa niya, importante nga mapalambo ang mga pasilidad sa eskwelahan ug madugangan pa ang mga classroom aron mas matubag ang panginahanglan sa mga magtutudlo ug estudyante.
Busa, padayon ang DepEd sa pagpatuman sa nagkalain-laing mga programa ug inisyatibo aron suportahan ang mga magtutudlo ug mapalig-on pa ang kalidad sa edukasyon sa tibuok Davao Region.
Photo Courtesy:DepEd Philippines
