Giila nga pinaka-extreme nga café sa kalibutan mao ang Gushi Cliff Coffee sa habagatang-sidlakan sa China,tungod sa lokasyon niini sa daplin sa usa ka habog nga pangpang, 60 metros ibabaw sa lebel sa dagat. Kini katumbas sa 20 ka andana sa usa ka building.
Sumala sa report, ang coffee shop dili ma-access ni bisan kinsa. Ang mga turista kinahanglan una nga maglakaw sulod sa 30 minutos sa via ferrata trail (puthaw nga hagdanan sa pangpang) ug mo-rappel paubos uban sa usa ka instruktor sa dili pa makaabot sa rectangular platforms nga nagsilbing lingkuranan.
Ang usa ka tasa sa kape nagkantidad og 398 yuan (gibana-bana nga Php3,200). Bisan kung kini may pagkamahal, giklaro sa tag-iya nga ang bayad naglakip sa insurance, safety equipment, guide services, ug walay limitasyon sa oras sa pagpabilen sa platform.
Giablihan kini niadtong 2004, apan bag-o lang nahimong viral sa social media tungod sa mga makalipong nga video sa mga turista nga nagsulay sa makahadlok apan makabungog nga kasinatian.
Photo Courtesy:XINHUA
