Misaka ang koleksyon ug gidaghanon sa mga giaprobahan nga permit sa mga meat establishment sa Dakbayan sa Sugbo niadtong Enero 2026 kumpara sa samang bulan sa miaging tuig.
Sumala sa kagamhanan sa dakbayan pinaagi sa Department of Veterinary Medicine and Fisheries – City Meat Inspection Service, gipakita sa datos ubos sa Mayor’s Management and Improvement Program pinaagi sa Management Information and Computer Services nga miabot sa Php 223,050 ang kinatibuk-ang koleksyon sa Enero 2026. Mas taas kini og Php 42,250 kun itandi sa Php 180,800 nga narekord sa Enero 2025.
Sa tibuok tuig 2025, miabot sa Php 1,205,250 ang kinatibuk-an nga koleksyon gikan sa mga regulated meat establishments, nga nagpakita sa padayon nga kita gikan sa mga negosyong nagsunod sa regulasyon sa dakbayan.
Ang mga lechon dealers nakatigom og Php 43,800, mas taas sa Php 32,650 sa Enero 2025 o pagsaka og Php 11,150.
Ang meat dealers, suppliers ug retailers nakarehistro og Php 49,450, mas dako og Php 5,050 kumpara sa miaging tuig.
Dako usab ang pagsaka sa meat processors, diin misaka ang koleksyon gikan sa Php 9,800 niadtong Enero 2025 ngadto sa Php 30,050 karong Enero 2026.
Ang mga meat shop operators nakapakita usab og kusog nga pagtubo sa koleksyon, gikan sa Php 8,950 ngadto sa Php 30,100.
Samtang ang koleksyon sa slaughterhouse nga walay narekord niadtong Enero 2025, miabot sa Php 3,600 sa Enero, 2026.
Sa bahin sa permit approval, mikabat sa 237 ka meat establishments ang giaprobahan sa Enero 2026.
Misaka ang approved lechon dealers gikan sa 33 ngadto sa 42, samtang ang meat dealers, suppliers ug retailers misaka gikan sa 44 ngadto sa 46.
Ang meat processors nidaghan gikan sa 13 ngadto sa 24, ug ang meat shopoperators misaka pag-ayo gikan sa 8 ngadto sa 28 ka giaprobahang aplikante.
Photo Courtesy: Reddit
