Sa lungsod sa San Isidro, adunay usa ka babaye nga ginganlan og Marites. Si Marites nahigugma pag-ayo kang Junjun ang pinakagwapo sa iyang panan-aw nga usa ka tricycle driver sa ilang barangay. Ang kagwapo niini, sama ni Piolo Pascual kung magpiyong ka gamay.
Apan adunay gamay nga problema kay wala gyud kahibalo si Junjun nga nahigugma si Marites niya. Ug bisan kahibalo man siya, dili gyud siya interesado. Mas interesado pa si Junjun sa iyang manok nga panabong nga ginganlan niya og “Brad Pitt.”
Tungod sa kasakit sa kasingkasing, nakahunahuna si Marites og plano nga sama sa salida sa Harry Potter and the Sorcerer’s Stone. Miadto siya sa merkado ug nipalit og “lumay” gikan sa usa ka misteryosang tindera nga sama sa kontrabida sa Marimar.
“Sigurado ka ani, Inday?” pangutana sa tindera samtang nagtan-aw sa bolang kristal nga klaro kaayong ginama ra sa plastik.
“Maski unsa, basta mahigugma lang si Junjun nako!” tubag ni Marites nga drama kaayo.
Gisultihan siya nga kinahanglan niya ampoan ang lumay matag gabii sulod sa pito ka adlaw samtang nagkupot og kandila nga adunay baho sa citronella. Kinahanglan usab siya moingon sa orasyon: “Junjun nga murag si Piolo, palangga-a ko bisan dili ko modelo!”
Pilay istorya, sulod sa pito ka gabii, gihimo ni Marites ang tanan. Ang iyang silingan nagtuo nga nisulod siya og bagong relihiyon.
Sa ikawalong adlaw, giimbitar niya si Junjun sa ilang balay og gitimplahan sa kape nga gisagulan sa lumay. Samtang nag-inom si Junjun, nag-ampo si Marites sa sulod: “Please, black magic, work your wonders!”
Pagkahuman og inom ni Junjun, mitan-aw siya kang Marites. Mihunong ang kalibutan. Mihunong ang hangin. Mihunong usab ang electric fan kay wala masaksak sa saksakanan sa kuryente eme!!!.
“Marites…” ingon niya nga seryoso kaayo. “Ngano?” kulba nga pangutana ni Marites.
“Ganahan ko nimo.” Napakuratan si Marites.
“Tinuod? Tungod sa lumay????”
“Nah,” tubag ni Junjun. “Tungod kay ikaw ra ang nagpa-utang nako og load kada semana. Ug ikaw ra sad ang nagpakaon sa akong manok nga si Brad Pitt.”
Nahilom si Marites. “So… wala diay epekto ang lumay?”
Mitubag si Junjun, “Unsay lumay? Ang imong gisagol sa kape? Asukar man to! Nakita nako ang pakete — ‘White Sugar, 1 kilo.’”
Didto ra nasayran ni Marites nga ang tindera sa merkado nagbaligya ra diay og ordinaryong asukar nga gibutang sa gamayng botelya ug gitawag og “Love Potion Supreme.”
Apan bisan pa, nahigugma gihapon si Junjun niya — dili tungod sa itom nga salamangka, kundi tungod sa iyang kabuotan ug pagka-generous sa load.
Sukad adto, wala na gyud si Marites nagtuo og lumay. Nagtuo na lang siya nga ang tinuod nga magic kay dili makita sa botelya… kundili makita sa GCash.
Busa mga kajuander ayaw pawala og load basin naa ra diay mangayo og load nimo og basin mao na ang imong forever.
Photo Courtesy: Blender Artist Community
