Nagpositibo sa ilegal nga drogas ang unom ka mga e-bike drivers nga gikan sa managlahi nga barangay sa Talisay City.
Sumala kang City of Talisay Traffic Operation Development Authority (CT-TODA) Head Jonathan Tumulak, tulo pa lamang sa 13 ka barangay nga adunay namasaherong e-bike ang nahuman na sa drug testing. Lakip sa mga barangay nga nipaubos na sa maong proseso ang Barangay Dumlog, Biasong ug Pooc.
Gikan sa kapin usa ka gatos ka drayber nga nasuta, unom ang nagpositibo sa ilegal nga droga, diin ang labing bata adunay pangidaron nga 19-anyos samtang senior citizen na ang labing edaran.
Padayon pa ang drug testing nga nagsugod niadtong nakalabay nga adlaw nga moluntad sa mosunod nga semana aron masuta usab ang ubang mga drayber sa nagkalain-laing barangay.
Gipasiugda ni Tumulak nga dili tugotan makabiyahe ang bisan kinsang e-bike driver nga walay sertipikasyon nga nagpamatuod nga negatibo sila sa drug test. Matod pa niya, importante nga drug-free ang mga drayber aron masiguro ang kaluwasan sa mga pasahero.
Giawhag usab ni Tumulak ang mga e-bike drivers ug kadtong nagtinguha mosulod sa maong panginabuhian nga biyaan na ang paggamit sa ilegal nga droga, tungod kay adunay ipahigayon nga kalit nga drug testing, ug ang mga magpositibo dili tugotan nga marehistro o makapadayon sa pagbiyahe.
