Nagpadayon ang Rural Health Unit (RHU) sa lungsod sa Nabunturan sa paghatag og nagkadaiyang serbisyong medikal alang sa katawhan, ilabi na karong panahona nga pausab-usab ang klima nga maoy hinungdan sa nagkadaiyang balatian.
Sa pakighinabi sa Juander Radyo Nabunturan News Team, gipahayag ni Gerald Paolo G. Rosas, RN sa RHU Nabunturan nga kanunay silang nagadawat og mga magpakonsulta ug magpa-check up matag adlaw. Matod pa niya, bukas ang ilang opisina aron motubag sa panginahanglan sa komunidad sa aspeto sa panglawas.
Dugang pa ni Rosas, anaa usab sa RHU ang Animal Bite Treatment Center o ABTC nga naghatag og libreng tambal ug bakuna alang sa mga napaakan sa iro ug ubang mananap.
Samtang nagpadayon ang paghatag og serbisyo, nagpahimangno usab ang RHU sa katawhan sa Nabunturan nga magmintinar sa kalimpyo sa palibot, siguruhong limpyo ug luwas ang pagkaon, ug magpakonsulta dayon sa pinakaduol nga health facility kon adunay gibating dili maayong kahimtang sa panglawas.
