Pangunahan sa Archdiocese of Cagayan de Oro City ang paghinumdom sa ika-40 nga katuigan sa Edsa People Power Revolution karong adlawa.
Giawhag ang tanan, labi na ang mga Katoliko nga musalmot sa ipahigayon nga aktibidad nga pagasugdan sa usa ka March Walk nga maggikan sa Provincial Capitol Grounds.
Mismong si Most Rev Jose Cabantan, Arsobispo sa Cagayan de Oro ang nagpaabot sa mensahe sa Sulat Pastoral gikan sa Catholic Bishops’ Conference of the Philippines kon CBCP kung asa ilahang gisugyot ang pagsaulog sa kasumaran sa People Power Revolution pinaagi sa mga musunod:
-Maghiusa sa pagbatok sa impunity kon kawalay tulubagon,
-Magmabinantayon alang sa public accountability ug pagbantay sa pondo, programa sa ug proyekto sa gobyerno.
-Makiglambigit sa mga panaghisgot o dayalogo o pag-apil sa mga martsa sama sa trillion-peso march.
-Suportahan ang mga matinud-anon ug takos nga mga lider.
Gipaklaro sab ni Archbishop Cabantan nga kini nga aktibidad abli sa tanan apan dili nila kini buot masagulan og bisan unsa klase sa pamolitika. Labi pa nga nag-unang tumong niini nga kalihukan ang pagbalik tanaw o paghinumdom sa kabayanihan sa katawhang Pilipino aron nga pahawaon sa gahom ang usa ka diktadurang rehimen. Milagro sab kini alang kanila labi pa nga walay armas nga gigamit ug bugtong paghugpong lamang sa katawhan o People Power.
Lambigit niini, gibutyag ni Msgr Nathaniel Lerio, Ad Intra Ministries Director nga padayon ang paningkamot sa Simbahang Katoliko alang sa paghiusa sa katawhang Pilipino sa pagduso sa kamatuoran ug kaayuhan sa tanan, apan pagbatok sa mga indibidwal nga giuna ang kahakog ug personal nga interes lamang.
Kahinumdumang kaniadtong February 25, 1986, milyong katawhan ang nibarog dili lamang sa EDSA apan sa tibuok nasud aron nga palagputon sa pwesto si kanhi Presidente Ferdinand Marcos Sr kinsa naputos sa kontrobersiya ug dahas ang pagpamuno human iyang gideklara ang Martial Law nga nagpihig sa katungod sa mga Pilipino ug nipatay sa demokrasya sa nasud.
