Naka red alert ang Armed Forces of the Philippines sugod pa niadtong Pebrero 21 alang sa ika-40 nga anibersaryo sa EDSA People Power Revolution, bisan walay namonitor nga dakong hulga sa gilaumang mga panagkatigum.
Sumala kang AFP spokesperson Col. Francel Margareth Padilla, nagpabiling andam ang militar sa paghatag og suporta kung mangayo og augmentation ang Philippine National Police, nga maoy nangunang ahensya sa pagmintinar sa kalinaw ug kahapsay panahon sa mga public assembly.
Sumala sa Tindig Pilipinas, gilauman nga molapas sa 30,000 ka tawo ang moapil sa rally nga kauban sa anibersaryo.
Nagdeploy ang PNP og kapin 13,000 ka kapulisan sa Metro Manila sa mga convergence area, dagkong dalan, transport hubs ug ubang importanteng lugar aron masiguro ang kaluwasan sa publiko ug ma-manage ang dagan sa katawhan.
Gipasiugda ni Padilla nga gitahod sa AFP ang demokratikong proseso samtang gipadayon ang pagseguro sa kalig-on ug seguridad sa nasud.
Photo Courtesy: Philippine News Agency
