Gitinguha sa Department of Health (DOH) nga mabakunahan ang 2.8 milyon ka mga bata sa Mindanao batok sa tigdas ug Rubella, duha ka sakit nga dali kaayo matakod pinaagi sa hangin ug mahimong hinungdan sa grabeng komplikasyon ug kamatayon.
Kutob sa Pebrero 20, nakaabot na sa 2.3 milyon o 82 porsiyento sa target ang nabakunahan sa mga temporaryo ug permanente nga vaccination sites nga gitukod sa lokal nga panggamhanan.
Sa maong ihap, 517,981 ka bata ang gikan sa Bangsamoro Autonomous Region in Muslim Mindanao (BARMM).
Sumala sa DOH ug sa mga eksperto, kinahanglan maabot ang labing menos 95 porsiyento nga vaccination coverage sa tibuok Mindanao aron makab-ot ang “herd immunity” ug malikayan ang posibleng outbreak sa tigdas ug tigdas-hangin.
Apan hangtod karon, aduna pay 520,645 ka mga bata nga ubos sa lima ka tuig ang panuigon sa Mindanao, lakip ang BARMM, nga wala pa mabakunahi batok sa maong mga sakit.
Nagpahimangno ang DOH nga taas ang risgo sa outbreak sa rehiyon tungod sa kadaghan sa wala pa mabakunahi nga mga bata. Nagpadayon usab ang ahensya sa pag-awhag sa mga ginikanan nga dalhon ang ilang mga anak sa mga health center alang sa routine immunization.
Sumala pa sa World Health Organization (WHO), niadtong 2024 lamang, mikabat sa 95,000 ang namatay sa tibuok kalibotan tungod sa tigdas, kasagaran mga batang wala o kulang sa bakuna.
Photo Courtesy : ImindsPh
