Nakaangkon ug samad bun-og sa lawas ang duha ka mga indibidwal human nalambigit sa disgrasya sa National Highway, Prk. 4, Brgy. Poblacion, Governor Generoso, Davao Oriental pasado alas 11:00 sa buntag, Pebrero 16, 2026.
Ang insidente nalambigit sa usa ka Raider 150 nga motorsiklo nga gimaneho ni Jowen Sison kinsa residente sa Prk. 5, Brgy. Sergio Osmeña, Governor Generoso uban sa angkas niini nga si Larjun Matig Aldao ug usa ka Toyota Innova nga nagtangag sa plakang ABQ 9575 nga gimaneho ni Jerry Baclig ug residente sa Brgy. Calapagan, Lupon, Davao Oriental.
Base sa report, parehong nagbyahe ang duha ka mga sakyanan gikan sa Governor Generoso ug paingon unta sa Mati City, apan pag-abot sa lugar insidente kalit nga mi-uturn ang Toyota Innova ug wala kini mabantayi sa nagsunod nga motorsiklo hinungdan sa disgrasya.
Tungod sa kakusog sa impak, nalabay ang mga biktima kinsa nakaangkon ug samad sa nagkada-iyang kalawasan. Daling gidala ang mga nasamdan sa pinakaduol nga balay tambalanan alang sa medikal nga atensyon.
Sa pagkakaron padayon pa ang imbestigasyon sa mga awtoridad sa maong panghitabo.
