Nadakpan sa kapulisan ang usa ka Top 7 City Level Most Wanted Person atol sa operasyon nga gipahigayon sa Digos City, niadtong nakalabay nga adlaw.
Gipahigayon ang operasyon sa Provincial Tracker Team sa Davao del Sur Police Provincial Office kauban ang lain-laing yunit sa kapulisan ug intelligence agents aron ipatuman ang warrant of arrest batok sa suspek.
Nadakpan ang suspek nga nailhan sa alyas “Jerry,” 65-anyos, sa iyang pinuy-anan sa Purok Talakitok, Barangay Dawis, Digos City.
Giatubang sa suspek ang kasong Attempted Homicide ubos sa Criminal Case Number 06-2013 base sa warrant of arrest nga gipagawas sa Municipal Trial Court in Cities sa Digos City.
Gibalhin ang suspek sa kustodiya sa Digos City Police Station samtang gihulat ang hustong disposisyon aron atubangon ang kasong ipasaka batok kaniya.
Photo Courtesy: Digos City Police Station
