Nanawagan ang Organisation for Economic Co-operation and Development (OECD) sa kagamhanan sa Pilipinas nga pakunhoran ang mga fiscal incentives ug anam-anam nga wagtangon ang VAT exemptions alang sa mga senior citizens ug mga pribadong tunghaan.
Sumala sa OECD, kini nga lakang gikinahanglan aron mapadali ang fiscal consolidation, mapaubos ang utang sa nasud, ug mapaubos ang budget deficit pinaagi sa mas epektibong pagkolekta sa buwis ug paggasto.
Lakip sa ilang sugyot ang pag-phase out sa corporate tax holidays ug ang pagbalhin sa pundo alang sa universal healthcare gikan sa kontribusyon sa social security paingon sa kinatibuk-ang buwis.
Girekomendar usab sa maong grupo ang pagreporma sa sistema sa pension sa mga sundalo ug uniformed personnel aron mas mapahapsay ang paggasto sa gobyerno.
Bisan pa man sa mga hagit sama sa nagkahinay nga pagsaka sa populasyon ug hulga sa climate change, gibanabana sa OECD nga ang Gross Domestic Product (GDP) sa Pilipinas mahimong mosaka og 5.1% sa 2026 ug 5.8% sa 2027 tungod sa mas ubos nga inflation. Aron makab-ot ang tumong sa “AmBisyon Natin 2040”, kinahanglan nga mapadayon sa nasud ang average nga 6% nga GDP growth ug mapataas ang productivity growth sa matag tuig.
Photo Courtesy: Corporate Finance Institute
