Gitapos ang selebrasyon sa ika-28th Charter Anniversary sa Kidapawan City pinaagi sa city-wide clean up drive, subay kampanya sa syudad nga “Luntian Kidapawan.”
Niadtong adlaw’ng Domingo daghang empleyado sa gobyerno ug mga residente misalmot sa panawagan ni City Mayor Jose Paolo Evangelista aron hiposon ang mga basura nga nahabilin human sa napulo ka adlaw nga selebrasyon.
Agig suporta mipahimutang sa nagkadaiyang kadalanan ang mga personahi sa City Government of Kidapawan aron manglimpyo, isip pagpabarug sa reputasyon sa dakbayan nga usa sa mga limpyo ug luntiang syudad sa Cotabato ug sa tibuok Rehiyon Dose.
Mitambong usab sa kalihokan ang mga pribadong sektor ug mga residente nga nagpuyo duol sa mga sapa, kanal, ug mga nag-unang dalan, diin dungan nilang gihipos ang nagkatag nga basura.
Gipadayag sa Panggamhanang Panlungsod ang dako nilang pasalamat sa tanang nakighiusa sa clean up drive ug sa tibuok selebrasyon, nga mitabang aron mahimong malinawon, organisado, ug malampuson ang ika-28th Charter Day sa dakbayan.
Photo Courtesy: Kidapawan City
