Posibleng mahimong hingpit nga balaod na sa ika-20 nga Kongreso ang balaodnon nga magtukod og nasudnong minimum wage system sa nasud.
Sa interview kang Ka-Mangagawa Partylist Rep. Eli San Fernando, anaa na sa committee level ang iyang balaudnon, ug posible nga sa unang quarter sa tuig debatihan na kini sa plenaryo.
Matod usab niya, nga posibleng padayon pa kining hisgotan sa ikaduha ug ikatulo nga pagbasa sa Kamara ilabi na nga daghan nang mga magbabalaod ang nipakita sa ilang suporta.
Dugang pa, nga tukma sa panahon nga adunay nasudnong minimum wage system nga magwagtang sa provincial rate, tungod kay ang tanang probinsya parehas nga apektado sa pagsaka sa presyo sa mga palaliton ug mga bayronon sa serbisyo.
Matod pa niya, nga dili makatarunganon nga ang mas taas nga suholan gimintinar sa Metro Manila samtang ang mga trabahante sa lain-laing probinsya gamay ra ang sweldo.
Giklaro usab sa magbabalaod nga adunay tulo ka tuig nga transition period kung mahimo na kining hingpit nga balaod.
Gipamahayag niini nga dili angayan nga mabalaka ang mga negosyante niini tungod kay hinay-hinay lang kining ipatuman aron dili makapakurat sa merkado sa PH ug dili usab makahatag og lapad nga negatibong epekto sa nagkadaiyang sektor.
Photo Courtesy: Politiko
