Gisugdan na sa namugnang task force ang operasyon batok sa saba nga tambutso o “bora-bora” niadtong niaging Biyernes sa gabii didto sa capitol compound sa dakbayan sa Malaybalay. Tumong sa maong grupo nga hingpit masumpo ang kasaba sa kadalanan ug madisiplina ang mga motorista nga naggamit og dili saktong ekipo.
Sa usa ka eksklusibong pakighinabi sa Juander Radyo Malaybalay, miingon si Traffic Operations Officer I, Justino Roy Bayo Santonino sa TMC Malaybalay, ang maong operasyon og 12 ka motorsiklo ang naimpound sa mga otoridad tungod sa nagkalain-laing kalapasan.
Lakip sa mga nasita ang usa ka sakyanan nga naggamit og ilegal blinkers ug laing sakyanan nga gitabonan ang plaka pinaagi sa pagbutang og lain nga plate number.
Dugang pa niya, dili lamang ang kasaba ang gi-monitor sa task force, apan lakip usab ang saktong suga ug rehistro sa mga sakyanan aron masiguro ang kaluwasan sa publiko.
Sa pagkakaron, nagpahimangno ang TMC Malaybalay nga adunay pa’y musunod nga mga “surprise operations” sa umaabot nga mga adlaw aron dili makapangandam ang mga malapason sa balaod. Giingon sa grupo nga padayon ang ilang pagpanakop ug gipaniguro nila nga dili i-kompromiso ang operasyon aron hingpit nga malimpyohan ang kadalanan gikan sa mga badlongon nga drayber.
via: PNP Malaybalay
