Lima ka indibidwal ang patay, samtang gidala sa nagkalain-laing balay tambalanan ang ang mga biktima human malagpot ang gisakyan nilang fruit hauler truck sa Purok 4, Barangay Lurogan, niadtong Pebrero 8, 2026.
Matod ni Barangay Kapitan Marlon Librando Jr., ang maong sakyanan hauler ug pinya gikan sa MKDC DOLE Philippines ug gisakyan sa mga trabahante nga wala magdahom nga madisgrasya.
Gikabutyag ni Zhaiful Rigor, human resource personnel sa MKDC, nga ang truck bag-o lang naghatod sa bag-ong naharvest nga pinya gikan sa plantasyon. Namatikdan usab nga padayon ang trabaho bisan Domingo, ug ang drayber sa maong sakyanan gikatahong substitute o “extra,” apan wala na maghatag pa og dugang detalye.
Dugang pa niya, duha ngadto sa tulo ka tuig nang nagtrabaho sa kompanya ang mga nangamatay nga trabahante isip outsourced personnel. Samtang nagpadayon ang kaandam sa kompanya sa pagtabang pinansyal sa mga biktima, giila sa inisyal nga impormasyon ang mga namatay nga sakop sa FARBECO harvester nga mao ang mga mosunod: Dogomeo Antonio, Macalde Maricel, Espinosa Violeta, nag-apelyidong Agsolay ug Esteban Darwin.
Pabiling kritikal sab ang usa ka lalaki nga Sabaiton ug duha pa ka babaye nga naapil sa disgrasya.
Sa pagkakaron, padayon ang imbestigasyon sa kapolisan samtang gipangita ang drayber nga nakaambak gikan sa sakyanan ug miikyas human sa panghitabo.
