Giduso ni House Majority Leader Ferdinand Alexander “Sandro” Marcos sa Ilocos Norte ang pag-abolish sa travel tax ug nagtuo siya nga tukmang panahon na nga tangtangon kini tungod kay nakadugang kini sa palas-anon sa mga Pilipinong biyahero ug sa pagbangon sa ekonomiya.
Gipaila ni Marcos ang House Bill No. 7443 nga nagtumong nga hingpit nga ipawalay bili ang travel tax nga gipaningil ubos sa Presidential Decree No. 1183 ug sa Tourism Act of 2009.
Sumala kang Majority Leader Marcos, ang travel tax nga moabot og Php 2,700 alang sa first class ug Php 1,620 alang sa economy class dugang gasto nga nagpugong sa paglihok sa mga Pilipino nga mobiyahe alang sa trabaho, pamilya, ug uban pang mga oportunidad.
Gipasiugda niya nga nagpabug-at kini ilabi na sa mga pamilyang Pilipino, ug mas maayo unta matod pa nga magamit ang maong kantidad sa mga nag-unang panginahanglan ug sa lokal nga ekonomiya.
Gihisgutan usab ni Marcos nga kadaghanan sa mga nasod sa ASEAN nagtangtang na sa susamang buhis aron mapasig-uli ang turismo ug Negosyo, busa nahimong dehado ang Pilipinas sa pagpadayon niini.
Ubos sa maong sugyot balaodnon ang pondo alang sa mga ahensya nga karon nakabenepisyo sa travel tax, sama sa TIEZA, CHED, ug NCCA, ihatag na lang sa General Appropriations Act.
Matod pa ni Marcos, dili pribilehiyo ang pagbiyahe alang sa daghang Pilipino kundili kabahin sa ilang panginabuhian ug relasyon sa pamilya, busa ang pagpaubos sa gasto sa biyahe makatabang sa turismo ug sa mga industriya nga nagsalig niini.
Photo courtesy to: Sandro Marcos
