Target nga mahuman sa katapusan sa tuig ang pagtukod sa Cebu City Medical Center (CCMC) ug andam na kining mag-operate sa 2027, sumala ni Cebu City Mayor Nestor Archival.
Matod pa sa mayor, adunay dili moubos sa 400 ka higdaanan ang pasilidad aron mas daghang pasyente ang matabangan ug mapalapad ang access sa serbisyong panglawas sa dakbayan sa Sugbo.
Gipasabot usab ni Archival nga nangita ang kagamhanang dakbayan og tabang ug suporta gikan sa Gobernador sa South Cotabato aron mapatuman ang gitawag nga “zero-billing policy.” Pinaagi niini, libre na sa bayad ang mga pasyente sa hospital fees ilabi na sa basic o ward accommodations.
Ang probinsya sa South Cotabato kasamtangang nagpatuman na sa Zero Balance Billing (ZBB) sa ilang mga provincial hospitals, nga tumong nga wagtangon ang out-of-pocket expenses sa mga pasyente.
Kung matuman, dakong tabang kini sa mga Sugboanon, ilabi na sa mga kabus ug nanginahanglan og serbisyong medikal.
