Gibungkag sa lokal nga kagamhanan sa Barobo ang ilegal nga operasyon sa pagmina sa Barangay Tambis human gimando ni Mayor Ronnie Martizano ang pagpatuman sa operasyon batok sa mga nasampit nga suspek, nga giingong mga Chinese national.
Sumala sa pamahayag ni Mayor Martizano, sa iyang pagsugod isip bag-ong alkalde sa lungsod, nasayran niya nga aduna nay unang mga kamanduan gikan sa Mines and Geosciences Bureau (MGB) ug sa buhatan sa Gobernador nga nagmando sa pagpahunong sa tanang illegal small-scale mining operations sa Barobo.
Bisan pa man sa nahatag nang Cease and Desist Order, namatikdan sa LGU Barobo atol sa ilang monitoring nga nagpadayon gihapon ang operasyon sa mga minahan, hinungdan nga ang lokal nga kagamhanan na mismo ang milihok aron ipahunong ang iligal nga kalihokan.
Niadtong Sabado sa buntag, Enero 31, 2026, gilunsad ang operasyon batok sa iligal nga pagmina sa Brgy. Tambis. Apan, wala na maabtan sa mga otoridad ang mga operator sa maong minahan, nga giila nga Mr. Luo ug Mr. Qin, pulos giingong mga Chinese national.
Bisan pa niini, ang mga kagamitan nga gigamit sa iligal nga pagmina gipangkumpiska sa mga operatiba ug temporaryong gikustodiya sa Municipal Environment and Natural Resources Office (MENRO) sa Barobo, samtang giandam ug giproseso ang angay nga mga kaso batok sa mga responsable.
Padayon ang pahimangno sa lokal nga kagamhanan nga hugot nilang ipatuman ang balaod batok sa tanang porma sa iligal nga pagmina aron mapanalipdan ang kanaiyahan ug kaluwasan sa komunidad.
