Gibutyag ni Tingog Party-list Rep. Jude Acidre nga posibleng mapadugay pa ang suspensyon ni Cavite 4th District Rep. Francisco “Kiko” Barzaga tungod sa posibleng pagsang-at ug bag-ong ethics complaint batok kaniya.
Sumala sa mga alegasyon, si Barzaga gipasanginlan nga nakahimo ug daghang paglapas lakip na ang pagkapakyas sa paglihok sa paagi nga angay ug kasaligan sa House of Representatives, pag-apil sa mga buhat nga supak sa balaod, maayung pamatasan ug uban pang kalapasan.
Ang reklamo batok kang Bargaza nalambigit sa pag-akusa kaniya sa pagdawat ug suborno bugti alang sa pagpaluyo sa re-election bid ni kanhi Speaker Martin Romualdez alang sa 20th Congress.
Kahibaloan nga si Barzaga gisuspenso ug 60 ka adlaw sukad niadtong Disyembre sa miaging tuig human sa usa ka ethics complaint nga gisang-at sa mga sakop sa National Unity Party (NUP).
Photo Courtesy: Wikipedia
