Nagpagawas og advisory sa mga mag-uuma ug mangingisda ang Department of Agriculture (DA), kalabot sa umaabot nga Bagyong Ada. Kini aron mapanalipdan ang ilang panginabuhian ug kinabuhi gikan sa posibleng epekto sa bagyo.
Hugot nga gitambagan sa DA ang tanang residente nga nagpuyo sa mga lugar, nga direktang maapektuhan sa bagyo nga mangandam ug mohimo sa tanang gikinahanglang pag-amping.
Nihatag usab ug importanteng rekomendasyon ang DA para sa mga mag-uuma. Una, girekomendar nga anihon dayon ang hinog nga mga tanom aron dili kini madaot sa kusog nga hangin ug ulan.
Ikaduha, gitambagan nga ibakwit ang mga importanteng liso ug kagamitan sa luwas nga lugar aron dili kini madaot o mawala.
Ikatulo, kinahanglan nga mag-andam og igong pagkaon alang sa kahayupan aron masiguro nga aduna silay makaon panahon sa bagyo. Ikaupat, importante ang paglimpyo sa mga kanal aron malikayan ang pagbaha sa mga umahan.
Sa bahin usab sa mga mananagat, nihatag usab ang DA tambag nga itago ang ilang mga sakayan sa luwas nga lugar aron dili kini madaot o maanod sa mga balod.
Labaw sa tanan, gidid-an sila sa paglawig panahon sa bagyo aron malikayan ang bisan unsang katalagman sa kadagatan.
Photo Courtesy: DA
