Gipahibalo sa Department of Foreign Affairs (DFA) nga sugod karung adlawa, Enero 16, 2026, ang mga Chinese nationals makasulod na sa Pilipinas sulod sa 14 ka adlaw nga walay visa.
Sumala sa DFA, ang lakang gitumong aron mapalig-on ang trade, investments, ug turismo, lakip na ang pagpalapad sa gitawag nga people-to-people exchanges tali sa Pilipinas ug China.
Giklaro sa DFA nga ang visa-free entry ipatuman lamang sa mga Chinese nationals nga mosulod sa nasud alang sa turismo ug business purposes.
Apan, giingon usab sa DFA nga balido lamang ang visa-free privilege sa pagsulod pinaagi sa Ninoy Aquino International Airport (NAIA) sa Metro Manila ug sa Mactan-Cebu International Airport (MCIA) sa Cebu.
Aron matugotan sa pagsulod, kinahanglan lamang nga magpakita ang mga Chinese nationals og balidong pasaporte, kumpirmadong hotel accommodation o booking, ug return ticket paingon sa ilang sunod nga destinasyon nga nasud.
Gipasiguro sa DFA nga hugot nga susihon sa Bureau of Immigration (BI) ang tanang Chinese travelers aron masiguro nga wala silay mga derogatory records sa dili pa tugotan nga makasulod sa Pilipinas.
Ang visa-free entry arrangement balido sulod sa usa ka tuig ug i-review kini sa dili pa kini mapaso.
Photo courtesy: PNA
