Gitaho sa Bangko Sentral ng Pilipinas (BSP) nga misaka og 10.3 porsiyento ang outstanding loans sa mga universal ug commercial banks (U/KBs) alang sa mga negosyo ug indibidwal niadtong Nobyembre 2025.
Base sa pasiunang datos sa BSP, nagpabiling lig-on ang pagtubo sa mga bank loans matag tuig niadtong Nobyembre. Sa seasonally adjusted basis, giingon sa BSP nga mitubo sab og 0.9 porsiyento ang outstanding loans year-on-year sa susamang panahon.
Matod sa BSP, medyo mihinay ang pagtubo sa mga loan sa mga residente ngadto sa 10.7 porsiyento niadtong Nobyembre gikan sa 10.9 porsiyento niadtong Oktubre. Bisan pa niini, padayon nga miusos ang mga loan sa mga non-resident, nga mimenos og 4.5 porsiyento—mas ubos kon itandi sa 11.1 porsiyento nga contraction sa niaging bulan.
Ang mga consumer loans sama sa credit card receivables, motor vehicle loans, ug general-purpose salary loans mitubo og 22.9 porsiyento niadtong Nobyembre, medyo mas ubos gamay kon itandi sa 23.1 porsiyento niadtong Oktubre.
Giingon sa BSP nga padayon nilang gimonitor ang pagpahulam sa bangko tungod kay usa kini sa mga importanteng agianan sa pagpatuman sa monetary policy. Maningkamot sab ang BSP nga maseguro nga ang domestic liquidity ug ang kondisyon sa pagpahulam sa mga bangko magpabiling haom sa ilang tinguha nga mapadayon ang kalig-on sa presyo (price stability) ug kalig-on sa panalapi (financial stability).
Photo courtesy: Bangko Sentral ng Pilipinas
