Gipasalig sa Department of Budget and Management nga ang salary increases, retirement benefits, o pension sa military ug uniformed personnel dili malangan o maapektuhan ubos sa 2026 national budget.
Sa gipahigayong press briefing sa Malacañang, gibutyag ni DBM Secretary Rolando Toledo nga dili tinuod ang mikaylap nga alegasyon nga ang mga pundo alang sa mga serbisyo sa personnel gitangtang ubos sa unprogrammed appropriations.
Giklaro niini nga ang gitumbok nga kantidad alang sa subsistence allowance increases sa military ug uniformed personnel gibalhin lang gikan sa miscellaneous personal benefit funds ngadto sa regular nga budget sa ilang tagsa-tagsa ka implementing agencies.
Kabahin matod pa kini sa polisiya sa gobyerno nga magbutang ug regular nga benepisyo direkta sa budget sa ahensya aron mas paspas, klaro, ug episyente ang pagpagawas ug paggamit sa pundo.
Gipasiugda usab ni Toledo nga ang salary increase sa kasamtangang mga kawani sa gobyerno, sibilyan ug uniformed personnel, nalakip na sa 2026 budget sa ilang tagsa-tagsa ka ahensya ug wala kini gitangtang, gi postpone, o gikuhaan.
Kabahin sa pension sa mga uniformed personnel, giklaro sa DBM nga wala kini naapektuhan.
Diin ang mahimong maapektuhan mao ang mga moretiro ubos sa optional retirement, apan ang gobyerno nag-andam og special purpose funds, lakip ang miscellaneous, personnel benefit funds ug pension ug gratuity fund, aron matubag kini nga mga obligasyon kon gikinahanglan.
Nasayran nga karung tuig 2026, magsugod na ang unang tranche sa base pay adjustment sa military ug uniformed personnel subay sa Executive Order No. 107, nga mobalor og Php21.7B, diin Php15.4 bilyones niini ang igahin alang sa active service base pay adjustment ug Php6.3 bilyones alang sa mga pension.
Photo Courtesy: Rappler
