Gipahimangnoan sa City Civil Registrar’s Office-Iligan ang publiko nga likayan ang pagproseso sa birth certificate pinaagi sa online, ilabi na kung adunay dakong singil sa matag transaksyon, tungod kay kini dili awtorisado ug wala gitugotan sa ilang buhatan.
Sumala ni Atty. Yussif Don Justin F. Martil, Department Head sa City Civil Registrar’s Office-Iligan, nga wala pa’y opisyal nga online registration nga gi-offer sa bisan unsang munisipyo o syudad sa tibuok Pilipinas.
Matod pa niya, ang registration ug uban pang proseso sa birth certificate kinahanglan personal nga adtuon sa City Civil Registrar’s Office.
Gidugang ni Atty. Martil, nga ang tinuod ug opisyal nga paagi sa pagkuha sa PSA Birth Certificate kay pinaagi lang sa Philippine Statistics Authority (PSA) sa Local Civil Registrar’s Office diin mismong narehistro ang pagkatawo.
Gipatin-aw usab nga ang Iligan City Civil Registrar’s Office maoy opisyal nga nagdumala sa local birth registrations ug pag-isyu sa local certifications sa syudad.
Nunot niini, gipasidan-an ang publiko nga dili mosalig sa mga third party sa social media nga nagtanyag og paspas o barato nga serbisyo, tungod kay kadaghanan niini mga scam.
Aron malikayan ang pagpangilad, gidasig ang mga lumulupyo nga mobisita sa official Facebook page sa City Civil Registrar’s Office o personal nga moduol sa ilang buhatan nga nahimutang sa Legislative Building, City Hall, Barangay Pala-o, Iligan City, alang sa dugang nga klaripikasyon ug hustong giya.
