Andam na ang mga Filipino pool legends nga sila Efren ‘Bata’ Reyes ug Francisco ‘Django’ Bustamante nga mosalmot sa World Nine-ball Tour (WNT) Legends karong Enero 21 hangtod 23 sa Gateway Mall sa Quezon City.
Uban nila sa kompetisyon mao ang billiard greats nga si Earl Strickland gikan sa Estados Unidos ug Ralf Souquet gikan sa Germany. Ang event naghatag og pasidungog sa golden era sa billiards nga naka-inspire sa pelikula nga The Color of Money ug nakatabang sa kalamboan sa pool sa tibuok kalibutan.
Ang mga duwa molungtad tibuok tulo ka adlaw, nga naka-schedule aron matag legend makaduwa kada adlaw. Ang mga duwa himoon nga race-to-11 uban ang alternate break, sa venue diin gipahigayon ang Philippines Open karong Oktubre.
Si Reyes, naila usab nga ‘The Magician’, nakadaog og kapin sa 100 ka international titles sa iyang karera, samtang si Bustamante nanguna usab sa daghang kompetisyon. Sila duha mao ang haligi sa Philippine billiards nga nag-inspire sa mas batan-ong henerasyon sama nila Carlo Biado ug Johann Chua.
Si Strickland ug Souquet, nga maoy mga batikan sa ilang mga nasud, nagpakita usab og kadaugan sa ilang mga karera. Karon, makigtigi sila sa usag usa aron i-renew ang ilang rivalry sa competitive nga entablado.
Photo Courtesy: WNT
