Patay ang usa ka bag-ong himugso nga bata nga napalgan sa usa ka bakanteng luna sa Acaciahan, Barangay Zone 1, Digos City, alas 8 kapin kun kulang sa buntag niadtong nakalabay nga adlaw.
Sumala kang Davao del Sur Provincial Hospital Chief Dr. Jaime Razo, bisan pa sa walay hunong nga paningkamot sa mga medical personnel aron maluwas ang bata, duha ka higayon kini giataki sa kasingkasing tungod sa mga komplikasyon ug sa ulahi nakabsan sa kinabuhi.
Sa impormasyon nga nakuha, usa ka babaye nga nanghalay sa maong lugar ang unang nakakita sa masuso. Matod pa niya, nakadungog siya og kusog nga paghilak nga una niyang gihuna-huna nga iring. Apan sa iyang pagdungaw ngadto sa kasagbutan, didto niya nakita ang usa ka cellophane nga kolor puti ug berde, ug sa dihang iyang gitan-aw, nakita niya ang tiil sa usa ka bag-ong himugso nga bata.
Ang nahisgutang masuso napalgan nga aduna pa’y pusod ug nagkadugo pa, sulod sa maong cellophane nga gilabay sa bakanteng luna, dali gilayon kining gitaho ug girespondehan sa mga awtoridad.
Sa pahayag ni Barangay Zone 1 Kapitan Jay Medina, gi-amigas na ang maong masuso, hinungdan nga grabe ang iyang paghilak. Nanawagan siya sa inahan sa bata nga makonsensya sa iyang gibuhat, tungod kay ang bata usa ka sagrado ug gasa.
Dugang pa sa kapitan, mas maayo pa unta kung giduol na lamang ang barangay o ang mga awtoridad aron matabangan ang bata, imbis nga biyaan kini sa kasagbutan nga makaluluoy tan-awon.
Padayon pa ang imbestigasyon sa kapulisan aron mailhan ug mapanubag ang responsable sa maong insidente.
