Dakpan sa kapulisan sa Surigao del Sur Police Provincial Office (SDSPPO) ang usa ka High-Value Individual (HVI) atol sa usa ka buy-bust operation batok sa ilegal nga droga kagahapon sa kaadlawon, Enero 13, 2026.
Sumala kang PCOL Jeffrey Lawrence D. Mauricio, Provincial Director sa SDSPPO, ang suspek giila sa alyas “Ben,” 33-anyos, residente sa Brgy. Poblacion, Cortes, Surigao del Sur. Nadakpan siya ala 1:21 sa kaadlawon sa Purok Langoyon, Brgy. Poblacion, Marihatag.
Ang operasyon gipangulohan sa SDSPPO Provincial Drug Enforcement Unit (PDEU) uban sa Marihatag Municipal Police Station (MPS) ug PDEA Surigao del Sur Provincial Office, base sa Target Intelligence Packet (TIP) pinaagi sa Provincial Intelligence Unit (PIU), ug sa koordinasyon sa Philippine Drug Enforcement Agency (PDEA).
Atol sa operasyon, narekober sa kapulisan ang lima (5) ka heat-sealed transparent plastic sachets nga adunay puti nga crystalline substance nga gituohang shabu, nga adunay gibug-aton nga 30 gramos ug gibanabanang kantidad nga ₱204,000.00. Lakip usab ang usa (1) ka tinuod nga ₱1,000 bill nga gigamit isip buy-bust money ug onse (11) ka buok nga peke nga ₱1,000 bills uban niini ang mga non-drug items.
Ang suspek ug ang nakumpiskang ebidensya gidala sa Marihatag MPS alang sa hustong disposisyon ug dugang nga imbestigasyon.
Photo courtesy: SDSPPO
