Giaprubahan sa Economy and Development Council (ED Council) nga gipangulohan ni Presidente Ferdinand R. Marcos Jr. ang ₱105.7 bilyon nga Public-Private Partnership for School Infrastructure Project Phase III (PSIP III) aron matubag ang kakulang sa mgaclassroom ug mapauswag ang kahimtangan sa pagkat-on sa mga pampublikong eskwelahan.
Sumala sa Department of Economy, Planning, and Development (DEPDev), pinaagi sa maong proyekto magatukod og 16,459 ka classroom sa 1,095 ka eskwelahan sa Luzon tali sa tuig 2027 hangtod 2028. Gilauman nga kapin sa 800,000 ka mga estudyante matag tuig ang makabenepisyo niini.
Tumong usab sa PSIP III nga maminusan ang gidaghanon sa mga estudyante sa matag classroom ug mapapas ang multiple-shift classes, nga dugay nang problema sa daghang pampublikong eskwelahan.
Dugang pa, giaprubahan usab sa ED Council ang dagkong proyekto sa transportasyon ug agrikultura nga gilauman nga makapalig-on sa konektibidad, makapadasig sa ekonomiya, ug makahatag og mas halapad nga kaayohan sa katawhan sa tibuok nasod.
Photo courtesy: PNA file photo by Avito Dalan
