Nasikop ang duha ka lalaki nga gituohang nagbaligya og ilegal nga droga human sa usa ka buy-bust operation nga gipahigayon sa Asuncion Police Station Drug Enforcement Team (SDET) niadtong nakalabay nga adlaw, sa Barangay Buclad, lungsod sa Asuncion, Davao del Norte.
Ang operasyon gipangulohan sa SDET ubos sa pagdumala ni PMAJ. Collin S. Rama, Hepe sa Asuncion Police Station, nga miresulta sa pagkadakop sa duha ka indibidwal nga giila sa mga alyas nga “Yan,” residente sa Brgy. Canatan, Asuncion, ug alyas “Kakan,” residente sa Brgy. Mankilam, Tagum City.
Nakuha sa maong operasyon ang gibanabana nga 1.5 gramos nga shabu nga standard drug price nga nagkantidad og Php10,200.00, lakip ang buy-bust money nga kantidad og Php500.00, ug uban pang drug paraphernalia nga gigamit sa pagpamaligya sa shabu, ug usa ka motorsiklo nga ilang gigamit sa maong transaksyon.
Ang tanang narekober nga ebidensya gimarkahan ug giinbentaryo diha mismo sa lugar sa operasyon, atubangan sa mga imbitadong witness subay sa mandato sa balaod.
Sa kasamtangan, balhog na sa prisohan sa Asuncion Police Station ang duha ka suspek ug mag-atubang sa kasong paglapas sa Republic Act 9165 o ang Comprehensive Dangerous Drugs Act of 2002.
Photo Courtesy: Verywell Mind
