Gipahigayon sa Department of the Interior and Local Government (DILG) Iligan City sa pagpanguna ni City Director Maria Maida Daniot ang usa ka target-setting activity alang sa Calendar Year 2026 isip bahin sa paglatid ug pag-uyon sa mga programa, proyekto, ug performance indicators subay sa estratehikong direksyon sa departamento ug sa mga prayoridad sa kalamboan sa siyudad sa Iligan.
Ang maong kalihokan nagsilbing plataporma sa paghusay ug pagtimbang-timbang sa mga nahimo sa miaging tuig, ug sa pag-ila sa mga mahinungdanong prayoridad nga gilaumang makapahugot pa sa lokal nga pangagamhanan ug makapaayo sa paghatod sa serbisyong publiko alang sa katawhan.
Pinaagi sa pagtinabangay nga mga diskusyon, gi-review ug giusab sa mga kawani ang mga target sa nagkalain-laing key program areas, diin gipasiugda ang accountability, efficiency, ug result-based management isip pundasyon sa ilang mga kalihokan.
Pinaagi sa pagtukod og klaro ug matumanon nga mga tumong alang sa 2026, gipamatud-an sa DILG Iligan City ang ilang lig-on nga pasalig sa pagsuporta sa mga local government unit diha sa pagpalig-on sa maayong pagdumala, kalinaw ug kahapsay, ug responsableng serbisyo nga motubag sa tinuod nga panginahanglan sa katawhan sa Iligan City.
Photo courtesy to: DILG Iligan City
