Gisugyot ni Senador Francis “Chiz” Escudero niadtong Huwebes ang pagtangtang sa 12% VAT sa pagbaligya sa kuryente aron daling makunhuran ang palas-anon sa mga pamilya ug mga negosyo. Ang iyang Senate Bill No. 496 nakatutok lamang sa kuryente, dili sama sa ubang mga sugyot nga lapad ang pagputol sa VAT nga mahimong makaapekto sa kinatibuk-ang kita sa gobyerno.
Sakop sa exemption ang pagbaligya og kuryente sa mga generation, transmission, ug distribution companies, lakip na ang mga electric cooperatives, ug ang serbisyo sa mga franchise grantees sa electric utilities. Sumala ni Escudero, makatabang kini nga lakang sa pagpaubos sa singil sa kuryente, pagpugong sa inflation, pagpataas sa disposable income (dugang kwarta nga magamit), ug pagpalig-on sa kompetisyon sa industriya, samtang nagpabiling responsable sa panalapi sa nasod.
Giila usab niya ang pasidaan ni Executive Secretary Ralph Recto batok sa lapad nga pagkunhod sa VAT, apan iyang gipasabot nga ang iyang sugyot “surgical” o nakatutok lamang sa usa ka kritikal nga isyu sa ekonomiya.
Photo courtesy: Philippine News Agency
