Personal nga gihatod ang usa ka magtutudlo sa Jose Tuason Jr. Memorial National High School sa barangay Madaum, Tagum City bandang alas 12:10 sa udto, Enero 6, 2026, sa estasyon sa kapulisan sa syudad sa Tagum, kinsa miturn-over sa usa (1) ka urine collector nga adunay sulod nga uga nga mga dahon ug liso nga gituohang marijuana.
Sumala pa narekober kini gikan sa usa ka ALS Junior High School student sa maong eskwelahan nga menor de edad, lalaki, human kini nagdala ug misulod sa eskwelahan pinaagi sa paglayat sa pader kinsa nadakpan sa nagduty nga Civil Security Unit (CSU) officer.
Subay sa report, narekober gikan sa posisyon sa gitawag nga rescued minor ang nasangpit nga ilegal nga butang alas 8:30 sa buntag, Enero 5, 2026 atol sa ilang pag-atubang.
Dayon, gi-report ug gi-turn-over sa CSU officer ang narekober nga butang ngadto sa mga magtutudlo sa Jose Tuason Jr. Memorial National High School. Adunay Estimated Standard Drug Price (ESDP) nga Baynte Pesos (Php 20.00) ug gibana-banang motimbang og kapin kon kulang 0.1 gramo.
Giawhag sa kapulisan ang tanang Tagumeños nga kon adunay nahibaw-an nga krimen o iligal nga kalihokan sa matag lugar, mamahimo kining ipahibalo gilayon pinaagi sa pag-dial sa 911 o pagtawag sa ilang mga hotline numbers.
Giturn-over na sa kustodiya sa City Social Welfare Development Office sa dakbayan sa Tagum ang maong menor de edad sa koordinasyon sa Tagum City Police Station Women and Children’s Protection Desk.
