Nagpahimangno karon ang Davao de Oro POLICE PROVINCIAL OFFICE batok sa kasagarang mahitabo nga pagbutyag sa personal nga problema sa social media, ilabi na ang pag-post sa hulagway o impormasyon sa usa ka indibidwal nga makadaot sa dignidad.
Sumala sa interview sa Juander Radyo News Team pinaagi ni Police Captain Jusibelle D. Abellion sa Provincial Police Office sa Davao de Oro, iyang gipahinumdoman ang publiko nga ang pagpakaulaw o dili awtorisadong pag-post sa social media adunay katugbang nga bug-at nga silot ubos sa balaod.
Sumala pa niya, hugot nga ginadili ang pag-post sa bisan unsang sulod nga may kalabotan sa usa ka tawo kung walay klarong pagtugot, ilabi na kung kini makadaot sa reputasyon ug personal nga kinabuhi.
Busa, padayon ang kapulisan sa pagpanalipod sa katawhan ug sa pagpatuman sa balaod batok sa mga dili angay ug dili responsableng paggamit sa social media.
