Patay na dihang nakaplagan ang usa ka 71-anyos nga lola nga naglutaw sa Hijo River, Villa Consuelo, Brgy. Apokon, syudad sa Tagum, hapon niadtong nakalabay nga adlaw.
Subay sa report sa Tagum City Police Station giila ang biktima nga si Zenaida (wala na gibutyag ang apelyido), residente sa Purok 5, Reservoir sa nasangpit nga barangay.
Sa gihimong follow-up investigation sa kapulisan, nasayran nga bandang alas-2:00 sa hapon, niadtong Sabado dihang nakit-an sa mga residente ang lawas sa biktima nga nagbuy-od ug wala nay kinabuhi.
Sumala sa anak niini nga ginganla’g Eric, niadtong Enero 1 pa ginapangita ang iyang inahan, kinsa katapusang nakit-an sa usa ka silingan nga nanguha og sili sa daplin sa sapa sa wala pa kini nahanaw.
Samtang gidugang sa kapulisan nga base sa inisyal nga pagtan-aw sa patay’ng lawas sa biktima, walay nakit-an nga mga timailhan sa foul play sa kamatayon niini. Gipahiluna na sa mga kabanay ang patay’ng lawas ni Zenaida alang sa iyang ulahing kapahulayan.
