Target sa Department of Agriculture (DA) nga dugangan ang produksyon sa sili sa nasud isip tubag sa padayon nga pagtaas sa presyo sa mga merkado.
Sumala ni DA Secretary Francisco Tiu Laurel Jr., ang lakang gitumong sa pagpalig-on sa mga plantasyon sa sili batok sa nagbag-o nga klima, nga usa ka dakong hinungdan sa pagkunhod sa produksiyon. Ang kalihim miingon nga ang presyo sa sili kanunay nga mosaka panahon sa mga kalamidad o kusog nga ulan nga makadaot sa mga pananom sa mga mag-uuma.
Dugang pa sa DA nga ilang gipasiugda ang paggamit sa mga pamaagi sa pagpanguma nga makasugakod sa klima, pagpalapad sa mga plantasyon, ug mas maayo nga pag apod-apod sa liso aron masiguro ang padayon nga suplay sa sili sa tibuok tuig.
Mahinumduman nga sa miaging tuig, ang presyo sa sili miabot sa ₱800 matag kilo human sa sunod-sunod nga mga katalagman nga miigo sa mga nag-unang lugar sa produksiyon niini.
Naglaum ang DA nga pinaagi sa pagpataas sa lokal nga produksiyon, ang presyo sa sili magpabiling barato ug ang panginabuhi sa mga mag-uuma mapanalipdan, samtang giseguro ang igong suplay alang sa mga konsumidor.
Photo Courtesy: Youtube
