Balos ang nakitang motibo sa Matalam Municipal Police Station, sa pagpanglabay og granada atol sa pagsugat sa bag-ong tuig sa National Highway, Barangay Dalapitan, Matalam, Cotabato, alas 12 sa tungang gabii niadtong Enero 1, 2025.
Sumala pa ni PLT James Warren Caang ang Spokesperson sa Cotabato Police Provincial Office kon CPPO, nga mao kini ang ialng nakitang motibo base sa imbetigasyon sa Matalam PNP.
Dugang pa, nga balos kini batok sa mga operasyon sa gobyerno sa kampanya kontra ilegal nga droga. Gikasubo usab niini, nga gidamay pa sa mga suspek ang mga walay labot nga unta malipayong musugat sa bag-ong tuig.
Kahinumduman, anaa sa 22 ka indibidwal ang nakahiagom og samad sa lain-laing parte sa lawas, human naigo sa mga sharp nails sa maong granadang gilabay.
Samtang, napatay usab sa operayon sa kapulisan ang usa sa mga gitudlong suspek nga si Hammad Samsudin Ansa sa Kilada, Matalam sa nahisgutang Probinsya.
Gipaniguro sa CPPO, nga ilang ginahimo ang tanan aron mapatubag sa balaod ang ubang suspek nga nipaluyo sa maong insidente.
Photo Courtesy:Jaco Mi
