Aduna nay mga persons of interest ang kapulisan sa Malaybalay City Police Station human sa nahitabong pagpamusil patay sa Purok 4A, Aglayan atol sa kasaulogan sa Binake Festival niaging Disyembre 23, 2025.
Sumala ni Malaybalay City Police Office Chief, Lieutenant Colonel Joepet Paglinawan, dakong posibilidad nga tinubdan sa krimen ang kalambigitan sa giilogang yuta sa nahisgutang lugar.
Gikataho nga ang biktimang si Purok President Richard Calo Rama, nalambigit sa paggiya ug pagpatuman sa writ of installation nga gi-issue sa Department of Agrarian Reform (DAR) ug kaniadto nanguna sa pagmentinar sa kahapsay panahon sa panagbangi sa maong yuta ug sumala sa iyang mga paryente, nakadawat na kini ug daghang hulga sa kinabuhi sa wala pa ang maong insidente.
Base sa imbestigasyon, sakay sa motorsiklo ang magtiayon pauli gikan sa pagtan-aw sa kalingawan sa barangay dihang gisundan sa riding-in-tandem ug gipamusil gamit ang gituohang kalibre 45 sa armas.
Nakaangkon ug tulo ka igo-pinusilan sa lawas ang biktima hinungdan sa kamatayon samtang anaa na sa luwas nga kahimtang iyang asawa nga si Texie Mae Del Campo kinsa natapsingan sa pinusilan niini.
Sa pagkakaron, hugot nga mipahigayon ug imbestigasyon ang kapolisan pagtumbok suspetsado alang sa tukmang aksyon sa maong panghitabo.
