Nasulbad sa Department of Trade and Industry (DTI) Davao Region, ang 100% nga mga Reklamo sa Konsyumer. Gilangkuban kini sa 316 ka reklamo nga gisumite sa tibuok rehiyon, nga nakaangkon og 100 porsyento nga resolution rate, sumala sa ahensya.
Base sa datos sa DTI – 11, kadaghanan sa mga reklamo gisumite pinaagi sa digital nga plataporma, diin 48 porsyento ang pinaagi sa email ug sa opisyal nga Facebook pages sa ahensya. Ang mga walk-in nga kliyente mitugot og 45 porsyento sa kinatibuk-ang reklamo, samtang unom (6) ka porsyento ang gisumite pinaagi sa Philippine Online Dispute Resolution System (PODRS).
Ang nabiling usa (1) porsyento giendorso sa ubang ahensya o sa Fair Trade Enforcement Bureau (FTEB) ngadto sa mga provincial office sa DTI. Ang pinaka-kasagarang isyu nga gibangon sa mga konsyumer mao ang malimbungon, dili patas, ug dili makatarunganon nga mga pamaagi sa pagpamaligya, nga naglangkob og 18 porsyento sa tanang reklamo.
Gisundan kini sa mga reklamo bahin sa warranty sa mga produkto ug serbisyo sa 17 porsyento, ug responsibilidad sa produkto ug serbisyo sa 16 porsyento.
Sa kinatibuk-an, kining mga isyu naglangkob sa katunga sa tanang reklamo nga nadawat sa maong panahon.
Gibutyag usab sa DTI 11 nga ang hingpit nga pagsulbad sa mga reklamo sa konsyumer nagpakita sa lig-on nga paningkamot sa ahensya sa pagpanalipod sa kaayohan sa konsyumer ug sa pagsiguro sa patas nga pamaagi sa patigayon sa tibuok Davao Region.
Photo Courtesy: Philippine News Agency
