Nagpadayag ug dakong pagpasalamat si Melecia Oyao, residente sa Purok 15, Casisang, Malaybalay City, ngadto sa Juander Radyo Loyalista Incorporated sa cash assistance ug benepisyo nga iyang nadawat sa pagkamatay sa iyang bana nga si Cornelio Oyao kinsa usa ka coordinator sa organisasyon.
Nabati ni Melecia ang tinud-anay nga pagtabang ug suporta nga iyang nadawat taliwala sa kasubo nga gidangatan sa iyang pamilya. Matod pa, ang maong death claim cash assistance dako gayod ug tabang sa ilang gasto sa pagpalubong sa iyang bana.
Sa laing bahin, si Romulo Jamisola, Cluster Head/Coordinator sa Juander Radyo Loyalista Incorporated Poblacion Malaybalay , mi-awhag ngadto sa publiko niadtong wala pa mamyembro sa grupo nga magpamiyembro na sila aron mahimong kabahin sa usa ka organisasyon nga andam motabang sa panahon sa kalisdanan ilbina kung adunay motaliwan nga kauban sa pamilya.
Ang Juander Radyo Loyalista Incorporated nagpadayon sa ilang misyon sa pagtabang ug paghatag og serbisyo sa mga miyembro ug komunidad, ilabina sa panahon sa kasakit ug panginahanglan.
