Gipasidunggan ug gihatagan og pahalipay sa Iligan Light and Power, Inc. (ILPI) ang piniling mga Barangay Health Workers (BHW) ug Barangay Tanod nga nailhan sa ilang ka-matinud-anon ug kaseryosohan sa pagtuman sa ilang mga tahas sa tagsa-tagsa ka barangay sa dakbayan sa Iligan.
Gihimo ang Recognition for the Most Outstanding Barangay BHW and Tanod sa Candelario–Cosuelo Multipurpose Hall sa ILPI Administration Building, Barangay Pala-o, Iligan City, kagahapon sa alas 9:00 sa buntag, Disyembre 16, 2025. Ang maong kalihokan kabahin sa corporate social responsibility initiative sa kooperatiba ug sa ilang mga empleyado.
Mitambong usab sa maong kalihokan si Iligan City ABC President Barangay Captain Cesarve Siacor sa Barangay Tomas Cabili, aron ipadayag ang iyang dakong pasalamat ug suporta sa mga BHW ug Barangay Tanod nga walay kahadlok nga nagsakripisyo sa pag-alagad sa ilang komunidad.
Gipasiugda ni ABC President Siacor nga dako kaayo ang papel sa mga BHW ug Barangay Tanod sa pagmintinar sa kahimsog, kalinaw, ug kahusay sa matag barangay, busa angay lamang, matod pa niya, nga hatagan sila og pagtagad ug pasidungog.
