Nagpahinumdom ang Department of Health (DOH) sa publiko nga mag-amping sa pagkaon ug kaluwasan sa dalan, ilabi na sa holiday rush samtang nagkaduol ang Pasko.
Sumala ni Direktor Lester Tan sa “Ligtas Christmas” sa Valenzuela City, ang kampanya karong tuiga nagtutok sa himsog nga pagkaon, luwas nga biyahe, ug sakto nga pagsaulog sa Bag-ong Tuig. Gitambagan niya ang publiko nga likayan ang sobrang pagkaon sa tam-is, parat, mantikaon, ug tambokon.
Sa datos sa MM-CHD niadtong kataposang quarter sa 2024, kapin sa 50,000 ka hamtong ang anaa sa peligro sa hypertension, 16,000 ang adunay diabetes, ug 110,000 ang adunay obesity.
Sa pikas nga bahin ang sub-kampanyang Biyahealthy nagtudlo sa luwas nga pagbiyahe, apil na ang pag-check sa sakyanan ug paglikay sa alkohol kon magmaneho, isip tubag sa pagtaas sa aksidente sa dalan matag Pasko.
Ang kanhi kampanyang Iwas Paputok (likay sa pabuto) karon kabahin na sa tulo ka sub-kampanya, human natala niadtong 2024 ang 422 ka insidente sa kadaot gikan sa pabuto, 31% mas taas kaysa miaging tuig.
Gipaningkamutan usab sa DOH kauban ang ubang ahensya sa gobyerno nga maseguro ang kaluwasan sa mga Pilipino sa pagsaulog ug pagbiyahe karong holiday season.
Photo courtesy: Department of Health
