Magsugod sa ikaduhang semana sa Enero 2026 ang operasyon sa pagpanangtang sa mga nagsagol, galambod, ug dili na magamit nga mga kable sa kuryente ug telecommunication companies sa Iligan City.
Kini subay sa kasabutan sa mga sakop sa Task Force Hapsay Linya, diin duha ka higayon matag semana adlaw’ng Martes ug Miyerkules ipahigayon ang operasyon sa paglimpyo sa mga linya.
Unang pagahapsayon ang Quezon Avenue, gikan sa daang Gaisano padulong sa Micron, sunod ang Roxas Avenue gikan sa Tubod Bridge paingon sa MSU-IIT.
Gikasabutan usab sa Task Force nga i-evaluate kausa matag bulan ang kalihukan aron masuta ang progreso sa operasyon.
Ang Iligan City Disaster Risk Reduction and Management Office o ICDRRMO ang maglatid sa katungdanan sa matag myembro sa Task Force, samtang ang City General Services Office ang mohipos sa mga putol nga kable. Ang Iligan City Traffic and Parking Management Office ang mopalihok sa traffic teams matag operasyon, ug ang City Engineer’s Office ang manguna sa pagkuha sa karaang mga poste ug linya sa ITALTEL.
Ipatuman usab sa Task Force ang One Pole Policy sa syudad aron malikayan ang sobra nga mga poste ug mapugngan ang grabe nga kagubot sa mga linya. Nunot niini, aduna na’y ordinansa ang syudad nga gikinahanglan ipatuman sa hingpit.
Gilauman usab nga ipatawag sa Task Force ang mga opisyal sa barangay nga maapektuhan sa operasyon, lakip ang Poblacion, Palao, Villaverde, Mahayahay, San Miguel, ug Tibanga.
Matud pa, ang paghipos ug paghan-ay sa mga wires ug poste kabahin sa direktiba ni Iligan City Mayor Frederick Siao, aron mas hapsay tan-awon ang kadalanan ug maminusan ang risgo sa sunog ug ubang kadaut nga dala sa nagkalambod nga mga kable.
