Gibutyag ni Pangulong Ferdinand Marcos Jr. nga gikansela na sa Department of Foreign Affairs (DFA) ang passport ni kanhi Ako Bicol Partylist Representative Zaldy Co, usa sa giimbestigahan may kalabotan sa gikaingong anomaloso sa flood control project.
Sumala sa Pangulo, gimanduan niini ang DFA ug Philippine National Police (PNP) nga makig coordinate sa mga embahada sa Pilipinas aron masiguro nga dili na magamit ni Co ang iyang gikanselang passport aron makalikay sa mga kaso nga giatubang niini. Lakip sa koordinasyon ang pagreport dayon kung mosulay si Co og pagsulod sa laing nasod aron dali siyang marepatriate pauli sa Pilipinas.
Gikumpirma usab sa Pangulo nga nagpabilin sa kustodiya sa National Bureau of Investigation (NBI) si Sara Discaya, nga giimbestigahan sa parehas nga kaso, human kini misurender kagahapon bisan wala pay gipagawas nga warrant of arrest batok kaniya.
Gisiguro ni Marcos nga hapsay ang dagan sa proseso ug moatubang sa hustisya ang tanang nalambigit sa operasyon ug panagkunsabo likod sa kwestyonableng mga proyekto sa flood control.
Padayon pa ang imbestigasyon ug ang pagpangandam sa mga kaso aron msikop ang mga responsable ug mabalik ang pondo sa gobyerno nga gituohang nausik tungod sa maong anomalya.
Photo Courtesy to: PTV News
