Pormal nang gisugdan karong adlawa ang Paleng-QR Ph Plus Program sa Ipil, pinaagi sa panguna sa Municipal Business Permit & Licensing Office (MBPLO). Gisabay niini ang Digital Literacy Orientation nga gitambungan sa mga lokal nga opisyales sa kagamhanan, DICT, GCash, mga bangko, transport groups ug representante sa nagkalain-laing business sectors.
Ang maong kalihokan nagtimaan sa pormal nga launching sa Paleng-QR Ph Plus sa lungsod, usa ka inisyatiba nga gidebelop sa Bangko Sentral ng Pilipinas (BSP) ug sa Department of the Interior and Local Government (DILG). Tumong niini ang pagtukod ug lig-on, luwas ug episyenteng digital payment system pinaagi sa mas halapad nga paggamit sa cashless transactions sa pampublikong merkado ug sa sektor sa tricycle.
Gi-awhag sa Lokal nga Kagamhanan ang tanang market vendors, miyembro sa TODA, mga negosyante, ug mga tag-iya sa sari-sari store nga moapil ug morehistro alang sa Paleng-QR PH Plus Launching & Registration. Usa kini ka lakang padulong sa Market Digitalization ug pagpa-modernize sa Government Services aron mas paspas ug mas kombinyente ang transaksiyon sa katawhan.
Lakip pa niini, makadawat ang mga moapil ug insentibo gikan sa lokal nga kagamhanan, ilabi na kadtong magbukas ug digital account isip suporta sa kalihokan.
Ang Paleng-QR Ph Plus usa ka pamaagi aron mas mapadali ang pagdawat sa bayad, mas mapaayo ang seguridad sa transaksiyon, ug mas mapa-level up ang negosyo ug serbisyo publiko sa Ipil.
